(Photo by philippinelifestyle com)

Isumat.com/10:30AM, July 11, 2020

Ginkakabarak-an nga tigda mahitaas an numero han waray plano nga pagburod ngan pag-anak hin mga kababayen-an ha Eastern Visayas yana nga panahon han pandemya durot han COVID-19.

Ini an dako nga isyu nga nakakapayong ha pagtigaman han World Population Day yana nga adlaw (Hulyo 11)

Dida han interview ha iFM-RMN Radio Tacloban, hi Reyan Arinto, Technical Officer han Commission on Population and Development Regional Office, in nagpahayag nga an ira buhatan in naatubang hini nga isyu ug ira ginbubuhat an mga pitad basi deri duro kadamo an matatabo nga waray plano nga pagburod.

Yana man gud nga panahon han pandemya, iginpapasunod an mga kwarentina ngan lockdown, sanglit kadam-an han mga magti-ayon in aadto la ha balay ngan pirmi aada an higayon han paghilawas. Nakadugang pa hini an kadelatar han panhatag han kontraseptibo o mga pamaagi basi kabalabgan an pagburod.

Tungod han istrikto nga pagbiyahe ngan mga lockdowns, nabalaung an pagdul-ong han POPCOM han mga contraceptives ngan posible dako an epekto hini ha paglobo han populasyon.

Ginbabanabana han ahensya nga ha katapusan nga parte hini nga tuig o temprano pa sunod nga tuig, damo an manganganak han mga nagburod durante han lockdown, pahayag pa ni Arinto.

Ginsasagdunan han POPCOM an mga mag-aragsawa nga antis maghilawas, mag-istorya anay hin maupay han ira mga plano, labi na an aspeto kun akos ba nira buhi-on an kadugangan nga mga anak.

Hi Arinto in nagsumat pa nga bastante an supply han Family Planning Methods ngan ginpapadagmit na nira an distribusyon ngadto han mga LGUs.

Ha Region 8, nangunguna la gihapon an pag gamit han pills, ngan mayda liwat kababayen-an an nagamit han implants ngan injectables.

Ha panig han kalalakin-an, haros waray nagpapa-ilarum han vasectomy ug kasagaran an mga babaye la an nagamit han mga kontraseptibo.

Dida han 2017 Cenus of Populatiion, 4.4 Million an tawo ha Eastern Visayas ngan haros 2 porsyento an paghitaas hini kada tuig, sering pa ni Arinto. #