(File photo by topgear philippines)

Isumat.com/11AM, July 9, 2020

Makarahibot yana pagpa-ayad han mga motorsiko in kadam-an nga Pilipino basi deri dakpon kun mayda angkas ha pagbiyahe.

Ini in dara kay tinikangan hiton Biernes, Hulyo 10, puede na magbiyahe an motorista nga mayda angkas. Pero matatabo la ini kun masunod han mga kondisyunes nga iginlatag han National Task Force Against COVID-19

Nagsering hi DILG Secretary Eduardo Ano nga an gintutugutan la nga umangkas o backrider amo an asawa o naglulungon ha usa nga balay bisan deri pa kinasal. Waray igpahayag ni Ano kun tutugutan ba an magtala-amay o anak ngan kag-anak nga ma-angkas ha motorsiklo.

Labot la hito, kinahanglan gihapon maghimo hin dibisyon dida han motor basi mayda makakagbulag han drayber ug an na-angkas. Kinahanglan an dibisyon in lapos ha ulo han duha nga sakay han motorsiklo ngan dapat mayda facemask ngan naka-helmet.

Kun maamo ini, magpapatuha o magpapa-welding an mga motorista hin divider nga igsasalpak ha motor basi makapasar ha mga otoridad.

Ini in maiha na nga hangyo han mga motorista ug an ira mga pamilya labi na gud nga kulang hin transportasyon ngan haros doble na an pasahe ha pampubliko nga mga sarakyan.

Ginpapa-andam han DILG an mga motorista nga may angkas han ira mga papeles o mga karig-unan nga magpapamatuod nga mag-asawa o naglulungon hira basi waray magin problema kun may magpapak-ana nga mga traffic enforcer o nagdudumara hin checkpoints. #