Isumat.com/9:08AM,July 9, 2020

Magsasalawad hin kaso an Philippine Army kontra han mga rebelde nga kumunista nga nagpatay hin makangingirhat nga paagi han sundalo nga ira gingamaan ha Motiong, Samar.

Nagsumat hi 8th Infantry Division Commander Major General Pio Dinoso III, nga deri makatawo an ginbuhat han mga rebelde nga NPA ngadto han ira sundalo. Tulo na ka adlaw an nakalabay, nahisumat nga nagkaada hin enkwentro ha Brgy Canvais, Motiong Samar.

Pero ini in pinanhimuwa ni Dinoso, kay sumala ha iya waray enkwentro nga natabo kay gin-ambush an duha nga sundalo nga sakay hin motorsiklo nga tikadto unta han nasabi nga barangay basi magdul-ong hin mga papeles kasumpay han ira ginhihimo nga Community Support Program. Samtang nagbibiyahe an duha nga sundalo, ginpa-arakan hira hin punglo han mga rebelde. Nag-antos hin grabe nga igo hin bala hi PFC Tejeras ngan natumba an motor.

Gindaup han mga rebelde an sundalo nga samaran ngan gintigbas ngan ginsunog pa an lawas. An usa nga sundalo in nakatalwas dida han insidente.

Igindig-on ni Dinoso nga kanan waray konsensya an ginbuhat han mga rebelde ngan ini in klaro nga pakatalapas han tinatawag nga Crimes Against Humanity. Mahugot gihapon nga ginkondenar han heneral ini nga panhitabo labi na nga deri combat operation an trabaho han duha nga sundalo ngan nabulig la hira para han mga programa han gobyerno para han mga baryuhanon.

Hi PFC Baybayon, an nakatalwas han ambush, in nakakilala han pira han mga rebelde ngan dida hini igpapatamak an ira igsasampa nga kaso.

An namatay nga sundalo in taga Nueva Ecija ngan iginbiyahe an iya patay nga lawas ngadto han iya lugar kakulop nga adlaw, pahayag pa ni Dinoso. #