Isumat.com/Enero 20, 2023
Ginkakaptan na yana han mga otoridad in usa nga negosyante ngan iya kaupod katapos hira arestuhon tungod han mga pusil ngan bala nga narekupo tikang ha ira dida hin usa nga operasyon ha San Isidro, Leyte, Enero 19, 2023.
An mga suspetsado nga aada na yana ha kustudiya han PNP-CIDG Regional Field Unit in ginkilala nga hira Emmanuel “Wing-wing” Veloso, 67 anyos, inasaw-an, negosyante ngan nag-uukoy ha Brgy Matungao, San Isidro; ngan Mark Rio Castillo, 45 anyos, residente han Brgy Kapinahan.
Ha report han PNP Regional Office, an mga personales han CIDG ngan San Isidro PNP Station in nag-implementar han Search Warrant nga iginpagawas han RTC-Branch 14, Baybay City hadton Enero 17, 2023.
Alas 10 han aga, Enero 19, ginhimo an operasyon han mga tinubyanan han balaud ha mga propyedad ni Veloso ha Brgy Paril ngan Brgy Linao, San Isidro. Nakuha dida han operasyon an masunod: usa nga 38 colt pistol nga may pito nga bala, usa ka magazine nga may napulo nga bala, 15 nga bala hin shotgun, kalibre 45 nga pistola nga mayda walo nga bala, ngan holster hin pusil.
An mga suspetsado ug an mga armas ngan bala in gindara ha PNP-CIDG para han kaangayan nga disposisyon ngan dokumentasyon.
Presente durante han imbentaryo han narekupo nga mga armas ngan bala amo an barangay kapitan ngan kagawad. An suspetsado in gin-asisteran hin duha nga abogado dida hini nga prosedemento.#
