Isumat.com/Enero 20, 2023
Usa nga proyekto para han kaupayan han panlawas han tawo ngan kalibungan an ginhihimo yana ha Ormoc City.
Amo ini an Healthcare Waste Treatment Facility nga gintikangan na an konstraksyon ngan gintatarget nga mahigamitan na antis matapos ini nga tuig.
Ha report han Ormoc News and Updates, an mga basura, hugaw ngan materyales nga gingamit ha mga hospital, medical clinics ngan iba pa nga health care centers in maagi anay dida hini nga facilidad basi limpyuhan ngan mawara an mga kemikal o elemento nga posible magin kawsa hin sakit ha katawhan ngan makadarahig ha kalibungan.
Katapos han paglimpyo han healthcare waste, igdudul-ong na ini ngadto han sanitary landfill han syudad.
Iginsumat han City Environment and Natural Resources Office nga moderno nga teknolohiya an gagamiton dida hini nga proyekto.
Sumala pa han report, nahimugso ini nga ideya durante han nahingorosoos an pandemya han Covid-19 kun diin nagtikadamo ngan nagtambak an mga basura tikang ha mga hospital ngan klinika.
An LGU-Ormoc ug an Department of Health an nagbinuligay basi ma-implementar an mao nga proyekto. #
