Isumat.com/7:14AM, October 14, 2020
Pagsasahiron ba han Covid-19 an bug-os nga Sinirangan Bisayas?
Ini an dako nga paki-ana nga nakakapayong yana ha bug-os nga Rehiyon Otso. Kun pag-oobserbaran an paglarab han virus, nagliliwan-liwan an mga lugar kun diin kadam-an nga mulopyo an natatapnan. May mga barangay, bungto ngan syudad nga nahideklalarar han DOH Regional Office nga “hotspots” han kagaw.
Paghuhugpoy han epekto han virus ha iba nga lugar, mayda liwat bag-o nga mga parte han rehiyon nga tigda an pagsirit han mga nagpopositibo. Dida han report han DOH kakulop, Oktubre 13, ginbunalan hin damo nga mga Positive Cases an Laoang ngan Catarman ha Northern Samar; ngan Maasin City, Southern Leyte.
Dida han Lunes, pito nga preso ha Sub-Provincial Jail ha Laoang an nagpositibo, ngan kakulop nadugangan ini hin 58 nga preso. Ini in labot la han 1 nga Health Worker ngan 1 pa nga residente han bungto nga natapnan. An karsel an iginpa-ilarum na hin lockdown.
Didto naman han kapital nga bungto han Catarman, 36 an bag-o nga kaso kun diin lima ha ira an Health Care Workers. Mayda gihapon 77-anyos nga Covid Patient dida han bungto an nahiireport nga namatay. Ha bug-os nga Northern Samar, porlomenos 90 an Active Cases hapagkayana.
Samtang, nanawagan hi Maasin City Mayor Nacional Mercado hin tim-os nga kooperasyon ngan pagburublig katapos la han bag-o nga 40 nga nagpositibo didto han syudad kakulop. Hadin Lunes, unom nga pulis ha Maasin an natapnan ngan igin-lockdown an Police Station ngan duha nga purok ha Brgy Combado.
Hapagkayana, an mga lugar nga damo pa an aktibo nga kaso amo an Calbayog, Catbalogan ngan Tacloban. Hinay-hinay naman nga nagtikaguti an mga kaso ha Basey, Villareal ngan Pinabacdao.
Ha bug-os nga rehiyon, 5,493 na an Total Cases ngan 4,725 (86%) an naka-recover. 52 naman an naawat an kinabuhi ngan mayda yana 716 nga Active Cases. #
