Isumat.com/7:53AM, October 14, 2020

Unom ka tawo an na-aresto ngan 102 Mil pesos balor hin iligal nga droga an nakumpiskar han mga otoridad han pagrondahon an gintotoohan nga “drug den” ha Brgy Bacubac, Basey, Samar, Oktubre 13, 2020.

Ginkilala an mga nagkadadakop nga suspetsado nga hira Paul Wences Medina alias Peewee, Jacob Medina ngan Philip Medina. Hira nga tulo an gintatahapan nga nagdudumara ngan nagpapalakat han drug den.

Arestado gihapon hira Chuckie Regala, Kristine Ciara ngan usa nga menor de edad. Sumala han mga otoridad, ini in posible parokyano han iligal nga droga kay nakadto man hira han sulod han drug den.

An mga operatiba han Philippine Drug Enforcement Agency (PDEA) an nagdumara anay hin buy-bust operation ngan nakapalit hin kinse ka gramos hin gintotoohan nga shabu kantidad hin 102 Mil pesos. Dida hini, ira na ginronda an lugar nga hinihimo nga baragliyaan ngan hiringgupan han droga.

An mga suspetsado in temporaryo ginpaslak ha PDEA Reional Detention Facility ngan ginsampaan na han kaangayan nga mga kaso. #