(file photo)

Isumat.com/11:49AM, October 13, 2020

Duha an patay ngan lima an nag-antos hin kasamdan han natabo nga panggama ha Brgy. Bahay, Sta Margarita, Samar pasado alas Singko han kulop, Oktubre 12, 2020.

Ginkilala an naawat an kinabuhi nga hira Denny Casaljay, 32-anyos, barangay tanod han Cagbayacao, Calbayog City; ug hi Orlando Layong Jr, 30-anyos, drayber hin habal-habal ngan taga Brgy Naga, Calbayog City. Hi Casaljay in naigo ha ulo samtang ha tiyan naman an igo ni Layong.

An mga samaran hira Punong Barangay Conrado Calagos han Brgy Cagbayaon; Benedicto Dacarra, Gino Calagos, Ariel Magbutay ngan Gino Calagos. Gindara ha magkalainlain nga hospital ha Calbayog an mga samaran. An ira mga kaupdanan nga hira Ariel Magbutay ngan Chito Ortiz an nagsumat ha Sta Margarita PNP han pag-ambush ha ira.

Nalutaw dida han inisyal nga imbestigasyon nga an grupo nira Brgy Kapitan Calagos in sakay hin upat nga habal-habal. Hira in tikang ha Brgy Cagbayaon ngan tikadto unta ha City Proper. Pag-agi nira hin tay-aw ngan masighot nga parte han Brgy Bahay ha Sta Margarita, tigda nala nagka-ulpot in pira nga suspetsado ngan ginpa-uranan hira hin bala.

An grupo han mga suspetsado in gintutudlok ngahira Alfredo Manas, Brgy Kapitan han Bahay; Edito Ampoan, Eddie Ampoan, Nelson Cailo, Jojo Burdado, Ikpul Purin ngan lima pa nga waray panhikilal-i. Hi Cailo in kagawad han Brgy Bahay.

Nakuha han mga imbestigador an basiyo hin mga bala hin 5.56MM, kalibre 45 ngan waray pa katudlok nga klase hin pusil.

An mga suspetsado in kadagmitan umiskapo ngan ginhahalpat yana han mga kapulisan. Waray pa gihapon hisabti an motibo hini nga panhitabo.

An Sta Margarita in porlomenos 6 kilometros la an distansya tikang ha Calbayog kun diin sunod-sunod an natabo nga panmatay han nag-agi nga pira ka bulan. #