Isumat.com/Enero 19, 2023
Mga kaso hin murder ngan attempted murder an iginsalawad han kapulisan kontra han mga suspetsado pagpatay kan Juanita Veloso.
Subay han iginsumat han Leyte PNP Provincial Office, iginsampa kakulop, Enero 18, 2023, ha Leyte Provincial Prosecutors Office an mao nga mga kaso kontra kanda James Damayo, residente han Brgy Campocpoc, Tabango, Leyte; Archie Fernando, taga Brgy Inangatan, Tabango; ngan duha nga John Does.
Hi Juanita, bugto han alkalde han San Isidro, Leyte in namatay han paarakan hin bala an ira behikulo hadton kulop han Disyembre 21, 2022 ha National Highway, Brgy Libongao, Kananga, Leyte. An duha nga kaupdanan ni Veloso in nakatalwas han panhitabo.
An grupo han 71-anyos nga hi Juanita in tikang ha Ormoc City ngan ti-uli na unta ha San Isidro han pagpanmumusilon han mga suspetsado nga sakay hin kolor grey nga pick-up.
Iginpahayag ni Leyte PNP Provincial Director Col Edwin Balles nga naningkamot an Special Task Group Veloso pagtirok hin mga impormasyon ngan mga ebidensya sanglit nakagsampa hira han nasabi nga mga lkaso.
Ginpamatakan han mga imbestigador an nakuha nga mga testimonya ha mga testigo, sugad man an mga CCTV footages nga nakakuha han insidente.
Iginpahayag pa ni Balles nga an pagpasaka hin kaso in dako an nahibulig ngadto han pamilya han biktima.
Hapagkayana, an mga suspetsado in padayon nga ginhahalpat han mga otoridad. Kasumpay hini, an Leyte PNP in nananawagan ha publiko nga deri mag-alang pagsumat ha ira kun mayda nira impormasyon mahitungod han kinamumutangan han mga gintatahapan.#
