Isumat.com/9:20AM, Marso 9, 2021

Mahugot an panawagan ni Samar Governor Michael Tan nga matapos na an panmatay didto han nasabi nga lalawigan.

Ini an lakip dida han opisyal nga pahayag han gobernador kasumpay han kamatay ni Calbayog Mayor Rolando Aquino kakulop, Marso 8, han insidente hin pinusilay didto han mao nga syudad.

Sumala kan Tan, nakikig-urusa hiya han panawagan nga maundang na an waray hangkag nga panmatay labi na gud ha syahan nga distrito han Samar. Ini nga bayolente nga mga panhitabo in angay matapos na, pahayag han gobernador.

Hinungdan hini, nanawagan hiya kan Presidente Duterte ug han mga natutu-inan nga ahensya han gobyerno nga maghimo han kaangayan nga mga pitad basi deri na magpadayon ini nga brutal nga panmatay nga nakapayong han 1st district hin maiha na nga panahon.

Ginpa-abot ni Tan an tim-os nga pagsimpatiya han kabido-an han pamilya Aquino ngan nagsering nga hiya mismo in nasusubo hini nga panhitabo. Mahugot gihapon nga ginkondenar han gobernador an pagpataya han Aquino.

Iginbuyagyag pa niya nga han tumalikod ha kadayunan an iya iroy nga hi anay Congresista Milagrosa Tan, hi Aquino in nakigkita ha ira basi personal nga magpa-abot han iya pagduyog han kabido-an bisan kun mayda nira pagkabirubungkil ha pulitika.

An pamilya Tan in maiha na nga nagkokontrol han pamunuan han Kapitolyo ug an 2nd district han probinsya. Nagpruweba hira nga agawon an liderato han Calbayog tikang kan Aquino. An bugto ni Governor Michael nga hi Angeli Tan in dumalagan ka-alkalde ha Calbayog kontra kan Aquino pero naperde hiya.#