Isumat.com/7:29AM, Marso 9, 2021

Gintuyo pagpatay pinaagi hin pag-ambush o may natabo nga “misencounter”?

Ini an lumutaw nga dako nga paki-ana katapos hin pira ka oras tikang mamatay hi Calbayog City Mayor Ronaldo Aquino ngan tulo pa nga iba dida han insidente hin pinusilay alas 5:30 han kulop, Marso 8, ha Brgy Lonoy nga namumutang ha norte nga dapit han mao nga syudad.

Labot la kan Aquino, naawat gihapon an mga kinabuhi nira Police Staff Sgt Rodeo Sario, 40 anyos, nakadestino ha Calbayog City PNP; Police Staff Sgt Romeo Laoyon, naka-assign ha Samar PNP Intelligence Unit; Police Capt Joselito Tabada;ngan Dennis Abayon, 33 anyos, ngan residente han Brgy Saljag, Calbayog City.

Hi Sario in sakay han van kun diin nakadto hi Aquino ngan gintutudlok hiya nga usa han police escorts han alkalde; hi Abayon amo an drayber han behikulo han alkalde nga Hi-ACE van; samtang hi Laoyon in gintutudlok nga kaupod han grupo nga sakay hin duha nga behikulo nga gin-aalegar nagsunod-sunod han sarakyan ni Aquino.

Dida han syahan nga PNP Spot Report, nag-aasoy nga ginpaarakan hin bala hin deri kilalado nga mga suspetsado an sarakyan han alkalde ngan bumulos pagpabuto an iya mga tauhan. Pero katapos hin duha ka oras, mayda na liwat Spot Report nga may namatay ha panig han mga nag-ambush ngan usa daw ini nga pulis. Mayda liwat impormasyon nga naha-una pagpabuto an grupo ni Aquino ngadto han van nga nag-iikog-ikog ha ira tungod kay nagdududa na hira.

Dida han interview han iFM-RMN Tacloban han Marso 9 han aga, nagsering hi Col Bella Rentuaya, spokesperson han PNP Region 8, iya iginsering nga namatay gihapon dida han insidente hi Police Captain Joselito Tabada. Hi Tabada in kaupod han grupo nga iginkapusilay han mga tauhan ni Aquino. Hi Tabada in nagin Chief of Police ha Gandara, Samar ngan naka-assign na yana ha Samar PNP Drug Enforcement Unit, sering pa han impormasyon.

Labot la han nahireport nga nagkamamatay, naigo hin bala pero nakatalwas hira Staff Sgt Neil Cebu, nga upod daw han grupo nga iginkapusilay han panig ni Aquino; ug an sibilyan nga hi Clint John Yauder.

Mayda mga katatapuran nga surok han Isumat.com an nagsaysay nga katapos han pinusilay, mayda pa usa nga grupo nga pumakadto han lugar ngan ginpanmumusil utro an van ni Aquino bisan kun damo na an sibilyan nga nag-uusyuso.

Igindugang pa han surok nga mayda natad-an nga pira nga plate numbers hin mga sarakyan didto han sulod han van han grupo nga iginka-engkwentro nira Aquino.

Hi PNP Chief Debold Sinas in nagmando kan PNP Region 8 Director BGen Ronaldo De Jesus nga magdumara hin kadagmitan nga imbestigasyon kasumpay hini nga panhitabo. An PNP Regional Office in nakatalaan maghimo hin Case Conference yana nga aga (Marso 9) kasumpay hini nga panhitabo.

Hi Samar 1st District Congressman Edgar Mary Sarmiento in nanawagan kan Presidente Duterte ngan DOJ Secretary Menardo Guevarra nga kinahanglan an NBI an mag-imbestigar han panhitabo kay nadadabi denhi an kapulisan.

Iginpahayag pa ni Sarmiento nga bubuhaton niya an ngatanan nga iya mabubulig basi makab-utan an hustisya ni Aquino. Nagpabati hin duro nga kabido-an an congresista tungod han kamatay han alkalde nga waray hunong an paningkamot para han pag-uswag han Calbayog.

Han Bise-Alkalde pa hi Aquino, hi anay Calbayog Mayor Reynaldo Uy in namatay han pusilon ha Hinabangan, Samar hadton 2011. #