Isumat.com/Enero 25, 2023
Boluntaryo nga nagtubyan han iya kalugaringon ha PNP-Regional Office 8 hi anay National Capital Region PDEA Director Erwin Ogario yana nga aga, Enero 25, 2023.
Ha pahayag nga iginpagawas han PNP Region 8, temprano pa yana nga aga sumurender hi Ogario ngadto han buhatan. Waray maghatag hin komentaryo an PNP kun mayda ba gin-aatubang nga kaso ha korte hi Ogario kay bangin ini nga bagay in napapa-ilarum na hin court proceedings.
An desisyon ni Ogario nga igtubyan an iya kalugaringon ha PNP-8 in tigaman nga tim-os an iya pagtapod han pagpadulot han balaud han PNP Regional Office, sering pa ni Regl Director Rommel Francisco Marbil.
Hi Ogario in ginlaknit ha serbisyo hadton 2017 han makonsiderar hiya nga High Value Individual dida han gindumara nga internal cleansing han PDEA kasumpay han iligal nga droga.
Hira Ogario ngan PDEA Agent Sherwin Manuel in gintanggal ha serbisyo katapos nga mapamatud-an han ahensya nga salaan hira hin grave misconduct. Ini in nag-ugat dida han kaso administratibo kontra han duha kun diin igin-alegar nga ira ginpagawas ha karsel an usa nga illegal drug importer nga na-aresto tungod han pag-import hin 1,358 nga tabletas hin ecstacy. Dida han report, waray daw kaso nga iginsampa kontra han importer.
Ha impormasyon nga nahikay han IsumatNews, hi Ogario in naatubang hin kaso ha Quezon City-RTC Branch 227 may kalabutan hin pakasupak han probisyones han Dangerous Drugs Act of 2002.#
