Isumat.com/Enero 26, 2023
(Update as of 7:30AM, Enero 26, 2023) Ha paningkamot han Can-avid PNP Station, natudlok na an suspetsado han krimen. An suspetsado in paryente han mister han biktima.
Waray la anay igbuyagyag an ngaran han gintatahapan samtang gindudumara an hot pursuit operations. Natudlok an suspect tungod han mga testigos ngan CCTV footage kun diin nahi-record ha mga CCTV an iya paglakat tikang han iya balay gamit an nasabi nga motorsiklo.
Hiya daw la an may sugad hito nga klase hin motorsiklo dida han bungto ngan tikang pag-gawas ha iya balay tobtob ngadto han gasolinahan kun diin iya ginpusil an biktima, an suspetsado an nagamit hito nga motorsiklo.
Igindugang pa han impormasyon nga an suspetsado in naka-piyansa ha kaso nga qualified theft. Ini nga kaso an nagin kawsa nga gin-aresto hiya hadton Agosto 2022, ngan nagpiyansa.
Ginkikitakita han mga imbestigador an anggulo han krimen nga problema o pagkabirubingkil ha pamilya .
(As of 8PM, Enero 25, 2023) Naawat an kinabuhi hin usa nga babaye katapos pusilon hin nakamotorsiklo nga suspetsado, Enero 25, 2023 ha Brgy 7 Poblacion, Can-avid, E. Samar.
Ginkilala an biktima nga hi Ruby-ann Ada, 39 anyos, inasaw-an, ngan residente han Brgy Cansangaya han nasabi nga bungto.
Waray hikilal-i an suspetsado nga naka-helmet ngan nagsusul-ot hin itom nga sweat shirt ngan jogging pants.
Ha inisyal nga imbestigasyon han Can-avid PNP Station, alas 11:50 han aga, pinusil han suspetsado hi Ada sapit hin usa nga gasolinahan ngan kadagmitan kumalagiw an gintatahapan gamit an motorsiklo.
Hapagkayana, nagpapadayon an imbestigasyon han kapulisan basi matudlok kun hin-o an suspetsado ug an posible nga motibo han krimen. #
