Isumat.com/Enero 26, 2023
Tulo nga Army Brigade Commanders han 8th Infantry Division an gintagan hin military honors han ira pag-abot ha 8thID Headquarters ha Camp Lucban, Catbalogan City, Samar hadin Enero 23, 2023.
An nasabi nga seremonyas in kasumpay han pagrekognisar han ira promosyon tikang ha koronel ngadto ha pagigin heneral han Armed Forces of the Philippines. An bag-o nga na-promote amo hira 801st Brigade Commander BGen Lenart Lelina, 802nd Brigade Commander BGen Noel Vestuir, ngan 803rd Brigade Commander BGen Perfecto Penaredondo.
Hira Lelina, Vestuir ngan Penaredondo in mga miembro han Philippine Military Academy “Sambisig” Class of 1991. Hira in lakip han 13 nga mga bag-o nga heneral han AFP nga ginpapanumpa ha ira bag-o nga ranggo ha atubangan ni Phiilippine Army Commanding General Romeo Brawner ha Fort Bonifacio hadin Enero 20, 2023.
Katapos han seremonyas, an tulo nga opisyales in naghimo hin courtesy call kan 8th ID Commander Major General Camilo Ligayo.
Dida han mao nga okasyon, iginsumat ni Ligayo nga an tulo nga opisyales in dako an nagin papel ha pagkab-ot hin kamurayawan hin damo nga lugar ha Sinirangan Bisayas nga hadto ginbansagan nga pugad han kumunista nga mga rebelde.
Sering ni Ligayo, pinaagi han liderato han tulo nga heneral, nag-antos hin dako nga paghirusdak an Eastern Visayas Regional Party Committee han CPP-NPA-NDF tungod han kamatay ngan pagsurender hin higtaas nga lider han kagi-usan kumunista, pagsurender han armado nga mga rebelde, pagrekupo hin kadam-an nga mga armas, ngan pagbawi han suporta han mga baryuhanon.
Hi Ligayo in nagdayaw han nahimo han mga heneral kay ini in nagdurot han gin-uungara nga pagpa-uswag han kinabuhi han katawhan labi na ha tay-aw nga mga lugar nga hadto apektado han aragway.
Iginpahinumdom ni Ligayo ngadto han tulo nga an ira promosyon in may kasugbong nga kadugangan nga responsabilidad ngan obligasyon nga angay nira tumanon.#
