Isumat.com/Enero 25, 2023
Nag-antos hin mga igo hin bala in usa nga abogado ngan empleyado han korte katapos la nga pusilon hira han suspetsado nga ginseserbehan hin kamanduan han hukmanan yana nga aga, Enero 25, 2023 ha Market Site, Brgy Cavite West, Palo, Leyte.
Ha interview han iFM-RMN Tacloban kan Palo Chief of Police LtCol Ricky Reli, ginkilala an mga biktima nga hira Atty Alexander Lacaba, 60 anyos, private lawyer, taga Sta Fe, Leyte; ngan hi Adolfo Petilla, 59 anyos, process server han RTC-Branch 43 ngan residente han Sta Cruz, Palo. Ginkilala naman an suspetsado nga hi Conrado Boren, inasaw-an, aada ha insakto nga pangidaron ngan residente han mao nga lugar ha Palo.
Ha inisyal nga imbestigasyon, an grupo nira Petilla in umaro hin suporta tikang ha Palo PNP Station para han pagserbe han Writ of Demolition tikang ha korte ngadto kan Boren. Upod han mga kapulisan, pumakadto na an grupo han nasabi nga lugar.
Han igseserbe na an kamanduan han korte, tigda nga gumawas an suspetsado ngan pira ka beses nagpabuto han iya dara nga pusil. Naigo hi Lacaba ha iya paa, samtang ha tiyan nga parte an tama ni Petilla.
Kadagmitan nga gindara ha hospital an mga biktima basi tambalon. Sumala kan Reli, nagsumat an team leader han kapulisan nga nagdara ha hospital nga deri kritikal an kahimtang nira Lacaba ngan Petilla hadto nga takna.
Dayon naman gin-aresto hi Boren ngan narekupo ha iya an kalibre 45 nga gintutudlok gingamit ha panmusil. Nakakakuha gihapon hin tulo nga basiyo hin bala hin kalibre 45 an mga imbestigador ha crime scene.
Nagsering hi Reli nga nagbabasol hi Boren han iya nabuhat, pero aminado an suspetsado nga nabido hiya han desisyon han korte nga nagpagawas han Writ of Demolition.
Hi Reli in nagpahayag pa nga an posible nga mga kaso nga ira igsampa kontra kan Boren amo in frustrated murder ngan tungod kay waray lisensya an pusil han suspetsado.#
