(Photo by BiliranIsland.com)

Isumat.com/6:12AM, Enero 7, 2021

Nadugangan na liwat an mga panmatay nga natatabo ha Eastern Visayas han pagpusilon ngan mamatay in usa nga anay barangay kagawad ha Naval, Biliran kakulop, Enero 6, 2020.

Ginkilala an biktima nga hi Romeo Berdida, 55 anyos, residente ngan ex-kagawad han Brgy Larrazabal, Naval.

Natabo an insidente han panmusil pasado alas 5 han kulop kun diin hi Berdida in natukdaw ha atubangan han iya balay han umagi an duha nga suspetsado sakay hin motorsiklo ngan pinusil an biktima. Sumala han mga testigos, nakabati hira hin duha nga buto hin pusil.

Nag-antos hi Berdida hin igo hin bala ha ulo ngan taludtod ngan binawi-an hin kinabuhi dida mismo han lugar han panhitabo. An kapulisan in nakakuha hin duha nga basiyo hin bala hin kalibre .45.

Tobtob yana, an Naval PNP Office in nag-iimbestigar han krimen basi matudlok an motibo ug an mga indibiduwal nga nanhihidabi hini.

Ini an ikatulo nga pagpatay ha Eastern Visayas ha pagsulod han bag-o nga tuig. Hadton Enero 1, usa nga negosyante ha Brgy San Joaquin, Tinambacan, Calbayog an pinatay ha sulod mismo han iya tindahan. Dida naman han Enero 3, usa nga lalaki nga nagmamaneho han iya motorsiko an gingamaan ngan pinatay didto ha Marabut, Samar. #