Isumat.com/7:19AM, Enero 9, 2021

Usa ka semana tikang pusilon ngan patayon in usa nga negosyante ha Tinambacan District, Calbayog, mayda na liwat shooting incident didto han nasabi nga syudad kun diin usa nga 2-anyos nga bata an biktima.

Sumala han inisyal nga imbestigasyon hadin nakalabay nga adlaw, an suspetsado nga ginkilala nga hi Joel Tarrenas, 37 anyos, residente han Brgy Ginbaoyan in sumulod ngadto hin usa nga balay ha Brgy Carayman.

Hadto nga takna, an bata ug an iya nanay in nakadto ha sulod han balay. Hi Tarrenas nga gintotoohan nga hubog hadto nga oras in bumunloy hin pistola ngan igintutok ngadto han magtala-iroy. Naningkamot an iroy han biktima nga mabalabgan an plano han suspetsado pero nakahimo la gihapon ini pagpabuto ngan naigo an bata ha wala nga talinga.

Kadagmitan gindara ha hospital an biktima basi pagtambalon. An suspetsado in nagpruweba hin pag-eskapo pero na-aresto han naglanat nga mga kapulisan. Hiya in preso yana ngan nakatalaan umatubang han mga kaso nga igsasalawad kontra ha iya.

Waray pa igpahayag han mga otoridad an motibo han krimen.

Hadin bag-o nga tuig, usa nga negosyante an pinusil ngan pinatay ha San Joaquin, Tinmabacan, Calbayog. Han nag-agi nga mga bulan, pira gihapon nga panmatay an natabo didto han syudad. #