Isumat.com/Enero 24, 2023
Temporaryo nga nakagawas ha karsel tungod han piyansa hira Emmanuel Veloso ngan Mark Rio Castillo nga gin-aresto han kapulisan tungod han narekupo nga mga pusil ngan bala tikang ha ira ha San Isidro, Leyte.
Iginsumat ni LtCol Eric Huesca, Chief han Criminal Investigation and Detection Group (CIDG) Region 8, nga hi Veloso ngan Castillo in nakagawas na ha detention facility han CIDG. An CIDG in nagsampa hin kaso nga illegal possesion of firearms and ammunitions ha Leyte Prosecutors Office kontra han duha.
Kun manunumduman, hi Veloso, bugto han alkalde ha San Isidro; ngan hi Castillo an gin-aresto han ig-implementar han mga otoridad an search warrant ha propyedad han mga Veloso ha San Isidro hadin Enero 19, 2023. Dida han operasyon, nakuha han mga otoridad in usa nga kalibre 38, usa nga kalibre 45, mga bala han 45 ngan 38 nga mga pistola, ngan mga bala hin shotgun.
Nagsering pa hi Cuesta nga an korte in nagrekomendar hin 200 Mil nga piyansa kan Veloso ngan 120 Mil naman kan Castillo.
Hi Castillo in na-aresto ngan napreso na hadto tungod hin iligal nga pagdara hin pusil, samtang mayda naman reklamo kontra kan Veloso pero tobtob la ini nga nahipatik ha police blotter, dugang pa ni Huesca.
Waray igsumat ni Huesca kun hira hin-o an nagsampa hin reklamo ha CIDG kasumpay han mga pusil didto han compound ni Veloso nga amo an ira ginpatamakan hin surveillance ngan pag-apply hin search warrant ha Regional Trial Court-Baybay City. Pero ginklaro han opisyal nga kun magkaada na hin pagbista an kaso, masasabtan ini ha korte kun hira hin-o an complainant.
Ginseguro gihapon ni Huesca nga limpyo ngan imposible nga magkaada hin pagtanom hin ebedensya dida han ira operasyon tungod kay mayda hira testigos nga barangay kapitan ngan kagawad, labot la han body-worn cameras kun diin nahi-record an video ngan ira karukayakan tikang han paglakat ha opisina tobtob han operasyon.
Iginbuyagyag pa ni Huesca nga bisan ngani hi Veloso in nagpabati hin pagpasalamat ha mga otoridad kay nagin patas an ira mga gi-os dida han operasyon.
Nagsering pa hi Huesca nga subay han ira pagsusi, waray derekta o inderekta nga kalabutan ini nga operasyon han search warrant ha compound ni Veloso ngadto han pagpataya kan Juanita Veloso dida hin nga ambush ha Kananga, Leyte hadton Disyembre 21, 2023.
Hi Juanita in bugto nira Emmanuel ug ni Mayor Bebot Veloso han San Isidro, Leyte.
Upat han mga suspetsado han pagpatay kan Juanita in ginsampaan na hin kaso nga murder ha korte.
Ini nga mga impormasyon tikang kan Huesca in subay han iya mga pahayag ha interview han iFM-RMN Tacloban han Enero 24, 2023.#
