Isumat.com/8:51AM, May 13, 2020
Tungod han pagkabaraka nga bangin natapnan han corna virus, damo nga kwartahan nga tawo an pumalit han Rapid Test Machine ngan mayda liwat ma-impluwensya nga mga negosyante ngan pulitiko an naglugaring pagkadto ha mga DOH ngan Private Hospital Laboratories basi magpakuha hin swab ngan matestingan kun mayda nira covid-19.
Ginklaro han Eastern Visayas Regional Testing Center nga deri puede an walk-in nga mga kliyente para han COVID-19 Confirmatory Test. Karuyagsidngon deri ini parehas han nababatasan nga mapakadto la ha hospital ngan mapa-check-up ngan kun mayda referral an doktor mapakadto na ha laboratory.
Hi Dr. Lory Ruetas, Information Officer han EVRMC, in nag esplikar nga an Molecular Laboratory in deri para han walk-in nga mga indibiduwal. An puede la amo an naka-confine ha EVRMC nga mga covid patients.
Puede gihapon ig-proseso an mga samples tikang han Local Government Units ngan iba nga hospital pero igpapadangat anay ini ha Regional Epidemiology Surveillance Unit (RESU) para han insakto nga labelling ngan recording. Kataliwan hini, an RESU an magdadara han samples ngadto ha EVRTC para han Confirmatory Test, pahayag han DOH.
An laboratoryo in abri tikang Lunes tobtob Sabado ngan walo ka oras an ira operasyon kada adlaw. 90 nga samples an puede ma proseso kada adlaw han laboratoryo.
25 samples na an naproseso han EVRTC tikang han Mayo 11 ngan ngatanan ini negatibo han corona virus. # (KEVIN SIOSANA)
