Isumat.com/8:21AM, May 13, 2020
Deri karuyag han syudad han Borongan nga bulkason na an General Community Quarantine. Kasumpay hini, hi City Mayor Jose Ivan Dayan Agda in nag-apilar nga igpadayon la anay an kwarentina ha ira syudad.
Kakulop man gud, nagdesisyon an Malakanyang nga an bug-os nga Region 8 in deri na igpapa-ilarum ha kwarentina tinikangan hiton Mayo 16, 2020. Kagab-i hi Agda in nagpadara hin pormal nga komunikasyon ngadto han Office of Civil Defense-Regional Office nga amo an namumuno han Inter-Agency Task Force on COVID-19 ha Eastern Visayas, sugad man kan Eastern Samar Governor Ben Evardone.
Dida han surat ni Agda, iya igintaltag an mga rason kun kay-ano deri pa angay bulkason an kwarentina ha iya nasasakupan nga syudad. Syahan nga rason nga an Borongan in waray bastante nga mga higamit sugad han ventilators nga kinahanglan kun may outbreak han sakit. Ikaduha nga rason amo an pagkamay-ada hin local Transmission han virus ha sapit nga probinsya nga puede maghatag hin peligro ha mga Boronganon kay deri naman magigin istrikto an checkpoints ngan damo na an magpapakagawas ha balay.
Nagtotoo gihapon an alkalde nga makakawang la an ira panlimbasog han nag-agi nga pira ka semana nga deri magsarang an virus ha ira lugar sanglit kun bulkason an GCQ, waray hangkag an ira paningkamot. Nababaraka gihapon hiya nga an pabulkas han GCQ in magreresulta hin karigumok ngan kagupong kay waray man insakto nga seguridad nga igpapasunod.
Ha luyo nga bahin, hi Mayor Boie Evardone han Arteche, Eastern Samar in deri gihapon na-abuyon nga tanggalon na an GCQ. Dida han iya facebook post kakulop, iya igindig-on nga an GCQ in dako hin duro an nahibulig ha pagsurapo han corona virus.
Sering pa niya nga kun mawara na an GCQ, magigin palayapay na an security measures ngan magdadalan ini hin kataragman ngan makaharadlok nga sitwasyon.
Ginklaro ni Evardone nga iya pa ginhuhulat an kumpleto nga detalye han resolusyon han National IATF, pero nagsering hiya nga mag rerekomendar hiya han pagpahilawig pa han GCQ ha iya munisipalidad. # (KEVIN SIOSANA)
