Isumat.com/9:15AM, May 13, 2020
Malipayon nga iginpasabot kagab-i ni Mayor Dexter Uy nga waray na residente han Catbalogan City nga positibo han COVID-19.
Ini in dara han ikaduha nga negative result han swab sample ni Patient EV#14 nga taga Catbalogan. Dara hini, an DOH in nagpahayag nga puede na ma discharge ha hospital an babaye nga pasyente, pero magkakaada pa hiya han katorse ka adlaw nga Home Isolation.
Kun aton manunumduman, hi Patient#14 in natapnan han virus ha bungto han Tarangnan kun diin hiya nagtatrabaho. An mga close contacts niya ha Catbalogan in nag negatibo liwat an testing han ira samples.
Nagsering hi Mayor Uy nga bisan kun waray na Positive Case ha ira syudad, kinahanglan la gihapon an istrikto nga pagpasunod han mga guidelines han GCQ basi deri na mautro an panhitabo.
Igin buyagyag liwat han alkalde nga mayda usa nga mulopyo han syudad an nag positibo ha Rapid Test ngan iginbutang na hiya ha Special Care Facility basi ma-obserbaran hin maupay. Pero ginklaro ni Uy nga kun positibo ha Rapid Test, deri ini karuyagsidngon nga positibo na han corona virus. Ini nga tawo in waray nira igkonsiderar nga Suspected Case kay waray man iginpapakita nga sintomas.
Ginsumat pa han amay han Catbalogan nga deri hira naghihipos o nagtatahob hin impormasyon kay importante gud an kamatuoran nga pagpasamwak o transparency labi na yana nga panahon han COVID-19 Pandemic. # (KEVIN SIOSANA)
