Isumat.com/Enero 27, 2023
Ha panlimbasog han mga tinubyanan han balaud ha kampanya kontra han iligal nga droga, hira in nakasikop hin pito nga mga suspetsado ha magkalainlain nga mga operasyon ha Leyte ngan Southern Leyte hadin nag-agi nga pira ka adlaw.
Dida han buy-bust operation han gintibhong nga mga pwersa han PDEA-RO8, Leyte PNP ngan Hilongos PNP Station, nabungkag in gintotoohan nga drug den ngan upat katawo an na-aresto ha Brgy Eastern, Hilongos, Leyte alas 8:30 han gab-i, Enero 25, 2023.
Ginkilala an mga suspetsado nga hira Eugenio Suarez ngan Julito Biabor, an mga gin-aalegar nga nagdudumara han drug den; ug an mga bisita nira nga hira Noel Valdazo ngan Raymundo Almendras. Narekupo dida han opoerasyon in walo ka sachet hin gintotoohan nga shabu may timbang nga 18.9 gramos ngan balor hin 170 Mil pesos.
Ha iba nga operasyon, nadakop naman an suspetsado nga hi Herbert Montederamos, 38 anyos, ha Brgy Tabunok, Bato, Leyte alas 1 han maagahon, Enero 25, 2023. Hi Monderamos in ginkokonsiderar han mga otoridad nga High Value Target.
Nakumpiskar tikang ha iya in pito ka sachet hin gin-aalegar shabu kantidad hin 340 Mil pesos.
Samtang, ha Brgy Mantahan, Maasin City, Southern Leyte, nasikmit han mga tinubyanan han balaud an gintatahapan nga hi Eric Salar dida han operasyon pasado alas 3 han kulop, Enero 24, 2023.
Nakuha tikang kan Salar in pito ka sachet hin gin-aalegar shabu kantidad hin 3, 400 pesos.
Didto naman ha Tabontabon, Leyte, arestado an suspetsado nga hi Ronald Marteja, 34 anyos, residente han Brgy Mering han nasabi nga bungto dida han operasyon han mga otoridad alas 8 han gab-i, Enero 26, 2023.
Nakuha tikang ha iya in walo ka sachet hin gintotoohan nga shabu kantidad hin 20 Mil pesos.
An mga suspetsado han nasabi nga mga buy-bust operation in maatubang han mga kaso tungod han pakatalapas han balaud kontra han iligal nga droga. #
