(PNP photo)

Isumat.com/Enero 27, 2023

Waray maka-ikyas an nagpakilala nga kontraktor ha Department of Education han arestuhon hiya han kapulisan dida hin entrapment operation Enero 25, 2023 ha Palo, Leyte.

Ginkilala an suspetsado nga hi Ma Francesca Macasojot, 31 anyos ngan residente han Brgy Canlapwas, Catbalogan, Samar.

Ha spot report han PNP, an suspetsado in nakigsabot han iya bibiktimahon nga magkita hira ha usa nga restaurant ha Palo. Antis hini, an ka-transaksyon ni Macasojot in nagreport ha mga otoridad nga na-utang ha iya an suspetsado hin salapi para hin negosyo.

Igin-alegar nga nagpakilala an suspetsado nga damo na an iya kontrata ha DepEd sanglit waray problema ha transaksyon. Dida hini, nakigsumpayan ha kapulisan an kasabot han suspetsado ngan ginlatag an entrapmant operation.

Gin-aresto han kapulisan an suspetsado ha akto han pagkarawat niya han 50 Mil nga kwarta nga gingamit ha transaksyon.

An mga otoridad in nag-iimbestigar pa yana kun mayda pa iba nga nabiktima hin panbudol an mao nga suspetsado. Ginsampaan na hin kaso nga estafa hi Macasojot. #