Isumat.com/6:05AM, November 7, 2020

Bitbit an paglaum para hin mamurayaw ngan malamrag nga kabubwason, nagsurender in duha nga miembro han rebelde nga New Peoples Army ha probinsya han Samar hadin nag-agi nga adlaw.

An 87th Infantry Battalion han Philippine Army in nagkilala han mga nagtubyan nga hira alias Sadam, 28-anyos; ngan hi alias Allan, 27-anyos. Hira in mga residente han Brgy Lawaan I, Paranas, Samar.

Ira gihapon igintubyan ha militar an duha nga M-16 nga riple sugad man kadam-an nga mga bala. Nagsumat hira Sadam ngan Allan nga naningkamot hira nga maka-eskapo tikang han kumunista nga kagi-usan basi makabalik ha panig han gobyerno.

Sumala han militar, an duha in regular members han Central Front Samar 1, Sub-Regional “browser” Committee han Eastern Visayas Regional Party Committee.

Hi Lt Col Reynaldo Balido, Commanding Officer han batalyon an nagseguro nga hihimoon nira an ngatanan basi mabuligan an duha ha pagbag-o han ira kinabuhi pinaagi han mga benipisyo nga igin-andam han National Government sugad man han Probinsya han Samar.

Dida gihapon han nag-agi nga adlaw, an Philippine Army upod an magkalainlain nga ahensya han gobyerno in nagpadangat hin magkalainlain nga serbisyo ngadto han mga rebel returnees ngan mga tagsuporta han NPA nga nagsurender na.

Ginbuhat an mga aktibidadis ha pira nga barangay ha Marabut ngan Basey, Samar. Panuyo hini nga pitad an ma-ayudahan an mga nagsurender han ira bag-o nga kinabuhi ngan hinayhinay nga igka-urusa ha mga kumunidad nga ira anay hadto ginbaya-an. #