Isumat.com/7:53AM, Abril 15, 2021
Nadugangan na liwat an nagtitikahalaba nga lista han mga nagkakadakop nga suspetsado pagbaligya hin iligal nga droga ha Tacloban City han ma-aresto in duha nga kalalakin-an ha magkalain nga buy-bust operation kakulop, Abril 14, 2021.
Syahan nga nasikop han mga otoridad an suspetsado ginkilala nga hi Erwin Toledo, 42 anyos, may asawa, ngan nag-uukoy ha Brgy 60, Aslum, Sagkahan. Hiya in na-aresto dida han operasyon ha Brgy 90, Payapay, San Jose pasado alas 3 han kulop.
Nakumpiskar tikang kan Toledo in pito ka sachet hin gintotoohan nga shabu may kabug-aton nga 1 gramo, ngan balor hin 20 Mil Pesos.
Pagka alas 6:40 han gab-i, an suspetsado nga hi Marvic Millano alias Amloy an nasikmit han kapulisan dida han operasyon ha Brgy 62, Sagkahan District. An suspetsado in 27 anyos, waray asawa ngan residente han mao nga lugar.
Narekupo tikang kan Millano in 4 ka sachet hin gin-aalegar nga shabu may timbang nga 4 gramos ngan kantidad hin 32 Mil pesos.
An duha nga mga suspetsado in nakapaslak yana ha karsel ngan nakatalaan salawdan han kaangayan nga mga kaso.
An naghimo han operasyon amo an mga operatiba han Tacloban Drug Enforcement Unit sugad man mga elemento han Tacloban City Police Stations 1 and 2. # (with report from Noel Tampil Sianosa, MRN-NTS)
