Isumat.com/9:10AM, Abril 15, 2021
An isyu-pulitika an usa han mga anggulo nga gintutumbok han kapulisan ha imbestigasyon han pagbuto hin “improvised” nga bomba ha usa nga balay ha Tanauan, Leyte.
Dida han panmaki-ana han iFM-RMN Tacloban kan Capt Bernardo Arcena, Chief of Police han bungto, iginbuyagyag han opisyal nga pira nga mga anggulo an posible hinungdan han panhitabo ngan usa hini an pulitika.
Pero ginklaro ni Arcena nga hapagkayana deri niya makukumpirmar nga pulitika gud ini kay maghihimo pa hira hin mas hilarum nga imbestigasyon.
Iya pa iginsumat nga mayda na nira “person of interest” hini nga kaso, pero waray niya igpamulong an pangilal-an han tawo. Nagsering la hi Arcena nga kinahanglan pa hin mahugot nga imbestigasyon ngan madig-on nga ebedensya para han case build-up kontra han mao nga indibiduwal.
Iginsaysay pa ni Arcena nga subay han inisyal nga eksaminasyon han PNP Regional Explosives Unit, an gingamit nga klase hin explosive material amo an tinatawag nga “badil,” an paburuthon nga ginagamit ha iligal nga pangisda.
An nasabi nga badil an iginlabay ngadto han panimalay ni Mildred Lopez kun diin nagkaada hin danyos an nasabi nga balay tungod han pagbuto. Hi Lopez in makusog nga tagsuporta ni Mayor Pel Tecson ngan hiya an nagdedepensa ha social media kan Tecson kun mayda mga pakaraot kontra han alkalde.
Aminado hi Arcena nga medyo makuri an imbestigasyon ngan pagtudlok han nagbuhat han krimen tungod kay waray testigos nga naghahatag hin impormasyon ngan waray CCTV camera harani han lugar.
Iginpatapod naman ni Arcena nga papahuruhugton nira an seguridad dida han bungto basi deri na mautro an sugad nga panhitabo nga syahan pala nga insidente hin pagpabuto hin explosive device ha kasaysayan han Tanauan.
An PNP Mobile Group in nagpadara na hin kadugangan nga personales basi umayuda han Tanauan PNP pagmentenar han kamurayawan dida han bungto labi na nga nagtitikapaso an pulitika. #
