Isumat.com/7:50AM, Abril 16, 2021
Gin-aresto han kapulisan an usa nga kapitan hin barangay ngan usa pa nga lalaki tungod han ira aktibidad kasumpay han pagpataya han iligal nga swertres ha Hernani, Eastern Samar.
Sumala han report, ginkilala an mga suspetsado nga hira Anacleto Tunacao, 51 anyos, inasaw-an ngan Punong Barangay han Brgy 01, Poblacion Hernani; ug hi Eric De Leon, 42 anyos, inasaw-an ngan residente han Brgy Batang han mao gihapon nga bungto.
Gin-aalegar nga an kapitan amo an “swertres coordinator” samtang hi De Leon in usa nga kolektor han pusta.
An mga operatiba han Regional Special Operations Group, Eastern Samar Provincial PNP ngan Hernani Municipal Police Office an nagdumara han operasyon kontra han iligal nga pagpahuygo pasado alas 4 han kulop, Abril 15, didto han lugar ni Tunacao.
Nakumpiskar tikang han mga suspetsado an markado nga salapi nga gingamit pagtaya han mga otoridad, mga higamit han pagpapusta ngan tulo nga cellphones.
An mga gintatahapan ug an mga ebedensya in gindara ha Hernani PNP Station para han kaangayan nga disposisyon. Gin-aandam an kaso nga igsasalawad kontra han mga suspetsado. #
