Isumat.com/Pebrero 13, 2023
Ha tinguha nga mas magin talwas an pagbiyahe ngan kabalabgan an iligal nga aktibidadis ha Maharlika Highway tikang ha Northern Samar tobtob Southern Leyte, ginpakurukusog pa han PNP Regional Office 8 an ira pwersa dida hini nga kalsada.
Dida han Pebrero 9, 2023, nagdumara hin send-off ceremony ha PNP Regional Office kun diin ginpangunahan ni Regional Director BGen Rommel Francisco Marbil an pag-deploy hin kadugangan nga personales nga maapi han Task Force Maharlika.
Ini in ginkokomponer hin 765 nga personales kun diin 9 ha ira an Police Commissioned Officers ngan 756 an Non-Commissioned Officers. Hira in igpapasarang basi makadugang han mga naha-una nga personales nga nadestino para han Task Force.
An Task Force Maharlika in ginsusuportaran han duha nga Sub-Task Forces nga amo an STF-Maharlika Samar Island ha panguna ni Col Joel Serrano ug an STF-Maharlika Leyte Biliran kun diin an lider hi Col Romeo Desiderio.
Pira na ka bulan an nakalabay, hi Marbil an nagmugso han Task Force kataliwan makakarawat hin mga reports nga an nasabi nga highway tikang ha Allen, N. samar tobtob ha San Ricardo, So. Leyte in gingagamit nga aragi-an han mga kontrabando sugad han iligal nga droga, layaw nga armas ngan produkto han illegal logging.
Mayda gihapon mga reports hin panmusil, panikas, hold-up an nasagap han PNP dida han nasabi nga highway.
An TF Maharlika in nagdudumara hin mobile patrol, road security, border control, mobile checkpoint ngan iba pa nga pitad ha pag-implementar han balaud. An mga personales han mao nga task force in magseserbe gihapon nga first responderskun may mga aksidente nga matabo ha kalsada.
Usa han dako nga nahimo han Task Force amo an karekupo han napulo ka bloke hin shabu ha Allen duha na ka semana an nakalabay.
Hi Marbil in nagpahayag nga an kapulisan in tim-os an paningkamot basi magin talwas an ngatanan ha Sinirangan Bisayas. #
