Isumat.com/2:30PM, June 9, 2020
Nagin abo in upat nga kabablayan han paglamunon ini hin kalayo didto ha Brgy Poblacion I, Capoocan, Leyte hadin nag-agi nga adlaw.
Subay han panguna nga impormasyon tikang ha Capoocan-BFP, an duha ka oras nga kalayo in nagtikang ha panimalay han 88-anyos ngahi Eutequia Macabenta nga nag-uusaan la pag-ukoy dida han iya balay.
Nagmamalatumat an report nga hi Macabenta in nagpupuriga han iya pagkaon han tigda la nagka-aada hin aberiya an hose han tangke han gas hinungdan han pagsibrang han kalayo nga naka-alakbat ngadto han paghagrani nga balay.
Tulo pa nga kabablayan an na-ugbaw ug an mga tag-iya amo hira Timotea Nicol, Clara Macabenta ngan duha ka andana nga balay nga gin-uukyan hin unom ka tawo.
Hi Eutequia Macabenta in natabagan han iya mga amyaw basi makagawas han naglalalahinggab nga balay pero nag-antos hiya hin 1st degree burns, pahayag pa han BFP.
An mga bombero in padayon pa nagdudumara han imbestigasyon hini nga insidente. # (KEVIN SIOSANA)
