(File photo by sun star.com)

Isumat.com/3:00PM, June 9, 2020

Mayda na liwat bag-o nga batch hin mga Locally Stranded Individuals (LSI) nga naka-uli nganhi ha Eastern Visayas tikang ha Cebu.

Kagab-i, sobra 200 nga LSI an umabot ha pantalan ha Maasin City, Southern Leyte ug ginbabanabana nga naka-uli na hira ngadto han ira tagsatagsa nga munisipalidad han rehiyon. Hira in gintapo han mga behikulo han tagsatagsa nga LGUs.

Kasagaran han mga nagka-abot in mga estudyante nga waray dayon maka-uli tungod han lockdown, sumala han report tikang ha Philippine Information Agency Regional Office 8.

Pag-abot nira ha Maasin City Port, deretso hira ginpa-ilarum hin disinfection antis pasakyon ngadto ira tagsatagsa nga lugar. Nakatalaan nga magkaka-ada hin duha ka semana nga kwarentina ini nga mga bag-o nga nakabalik ha Eastern Visayas.

Hadin naglabay nga duha ka semana, mayda nagka-abot pinaagi hin barko nga dumo-ong ha Calbayog ug ha Tacloban. Magpapadayon pa ini nga aktibidad tobtob nga mayda pa nabibilin nga mga na-stranded ha Cebu.

Tobtob yana, waray pa an pampubliko nga transportasyon tikang ha Cebu nganhi ha Region 8 ngan ini nga mga biyahe yana in pinaagi han panlimbasog han gobyerno. # (KEVIN SIOSANA)