Isumat.com/8:16AM, September 15, 2020
Binawi-an hin kinabuhi an usa nga sundalo han maigo ini hin bala durante han engkwentro ha butnga han mga tropa han gobyerno ngan rebelde nga NPA ha Kananga, Leyte hadin Setyembre 13, 2020.
An namatay nga sundalo in ginkilala nga hi Cpl. Nicxon Tomenio, kaapi han Bravo Company, 93rd Infantry Battalion han Philippine Army.
Hadto nga petsa, an grupo nira Tomenio in nagpapatrolya ha Sitio Canawang, Brgy Rizal han ira igkasurapo an hugpo han mga rebelde nga kumunista ha panguna ni Juanito Selleza alias Tibor. An mga rebelde in nakigpinusilay kontra han mga sundalo kun diin gingamit han mga kumunista an mga sibilyan nga ira sagang samtang na-atras hira.
Naigo dida han agway hi Tomenio ngan gindara ha hospital pero igindeklarar nga Dead on Arrival. An mga ka-urusa ni Tomenio in nagpadangat hin hul-os nga pagsaludo ngadto han namatay nga igin-alay an kinabuhi para han nasud.
Dida han nasabi nga agway, nadakop han mga sundalo in tulo nga mga rebelde ngan usa ha ira in 14-anyos nga daragita nga bag-o na-recruit han kagi-usan. Narekupo gihapon in kalibre .45 nga pusil, mga bala ngan subersibo nga mga dokumento.
Mahugot nga ginkondenar han militar an binuhatan han mga rebelde nga ginbaliwaray an kahimtang han mga sibilyan ngan kabataan nga ira ginhimo nga panagang dida han engkwentro.
