Isumat.com/8:32AM, September 15, 2020
Tungod han pakigbulag han iya minayoyo nga oyab, waray maka-ilob han duro nga kabido-an an usa nga lalaki ha Palo, Leyte ngan nagdesisyon hiya nga magpakamatay.
An report han Palo PNP Office in nagmamalatumat nga an biktima in 25 anyos nga lalaki, usa nga driver ngan residente han nasabi nga bungto. An kag-anak han biktima an nakadiskubre han panhitabo han makasulod hira han kwarto han ira anak ngan ira nakit-an an nabitay nga lawas han biktima.
Nagsering an kag-anak han biktima nga tikang makigbulag an oyab han ira anak ngan mag-asawa hin iba, nagin mabido-on ini pirmi ngan deri na tuhay nga iginkaka-istorya. Waray naman nakit-an nga foul play an mga imbestigador dida han insidente.
Han nag-agi nga pira ka bulan, haros kada semana may natatabo nga pagpakamatay denhi ha Rehiyon Otso. An iba hini tungod han problema ha paghigugma, depresyon ngan sakit nga deri natatambal.
An DOH in nag-aghat ha publiko nga kun mayda miembro han pamilya o paryente nga sugad hini an gin-aantos, deri mag-alang pakigsumpayan ha ira ahensya basi katagan dayon han kaangayan nga aksyon. #
