Isumat.com/7:21AM, September 16, 2020
Dako an posibilidad nga sindikato hin droga an may kalabutan han sunod-sunod nga panmatay ha Palo, Leyte kun diin tulo nga retirado nga pulis ngan tulo nga sibilyan an mga biktima.
Nagpahayag hi Leyte PNP Provincial Director Col Rodelio Samson nga an istilo han panmatay in binuhatan hin sindikato tungod kay waray kahadlok ngan mga professional killers an nagbuhat hini.
Segun han opisyal nga nalutaw ha panguna nga imbestigasyon an anggulo nga may natabo nga “onsehan” ha mga miembro han sindikato sanglit bumutho ini nga deri pagkasarabot ha sulod mismo han sindikato. Kun natatabo ini, posible nga magipatay-patay nala hira.
Aminado hi Samson nga hapagkayana, kinukuri-an an mga imbestigador nga matudlok kun hira hin-o an mga suspetsado kay peke nga mga plate numbers an gingamit ha mga sarakyan han mga suspetsado.
Kasumpay hini, hi Samson in nagmando ha mga kapulisan ha Leyte nga kinahanglan deri na mautro ini nga panhitabo. Partikular nga ginsugo ni Samson an bag-o nga hepe han Palo PNP ngahi Major Aldo Mendiola nga padagmiton an pagtudlok han mga suspetsado basi masampaan na han kaangayan nga mga kaso.
Han nag-agi nga usa ka bulan, duha nga ambush an natabo ha Palo kun diin namatay an unom nga mga biktima. Gintotoohan nga nadadabi an iligal nga droga dida han panmatay kay pira han mga biktima in nahilambing han nasabi nga iligal nga aktibidad. #
