Isumat.com/7:40AM, September 16, 2020
Tinikangan yana nga adlaw, Setyembre 16, makakasulod na liwat ha probinsya han Biliran an mga Locally Stranded Individuals tikang ha iba nga rehiyon.
Ini an nagin desisyon han pamunuan han lalawigan ha panguna ni Governor Rogelio Espina katapos han kunsultasyon han magkalainlain nga sektor han probinsya nga nanginginano han sitwasyon han Covid-19. Kun manunumduman, usa ka bulan nga waray tumugot an probinsya nga makabalik ha ira lugar an mga LSI kay napuno an mga Quarantine ngan Isolation Centers.
Pero ginklaro ni Espina nga deri pa puede makabalik an mga LSI ngadto ha Maripipi kay damo pa an aadto ha Isolation Unit han isla nga munisipalidad.
Mahugot nga iginmando han gobernador nga kinahanglan an hingpit nga koordinasyon han mga LSI ngadto han ira tagsatagsa nga LGU basi magin hapsay an proseso ngan waray makakalusot kay posible pagtikangan ini hin peligro. Umabot na 101 an na-alakbatan han kagaw nga mga Biliranon.
An iba nga syudad ngan probinsya ha Eastern Visayas in nagpapatuman pa hin travel ban han mga LSI tobtob Setyembre 30.
Ha luyo nga bahin, nadugangan hin 60 nga Covid Patients an Rehiyon Otso. Tungod hini, aada na ha 3,885 an nagpositibo han kagaw ha Sinirangan Bisayas.
Dida hini nga ihap, 3.179 (81%) an naka-recover. Mayda naman 668 nga Active Cases hapagkayana. Iginreport pa han DOH Regional Office an usa nga pasyente nga namatay, sanglit 38 na an tumalikod ha kadayunan nga nagpositibo han virus.
