Isumat.com/1:01PM, September 16, 2020
Padayon an ginbubuhat yana nga imbestigasyon han mga personales han Fishery Section han LGU-Daram basi masegurado kun nahilu-an gud man han Red Tide an duha nga kabataan ha Brgy Bagacay han nasabi nga bungto.
Sumala han report, an mga otoridad in nagkuha na hin samples han tubig ug an tahong tikang ha kadagatan hnga harani han mga barangay han Bagacay, Yangta ngan Cabac. Karuyag han LGU nga matudlok gud kun Red Tide Poisoning an rason han kamatay han mga biktima.
Kasumpay hini, mahugot nga nagderi an LGU ha mga bungtuhanon han pagkuha ngan pagkaon hin bisan ano nga pangti-on o shellfish ngan pasayan tikang han mao nga parte han kadagatan.
Pira pala ka oras an nakalabay, an DOH Regional Office in nagpasamwak hini nga panhitabo ha Daram. Nagsering an ahensya nga unom ka tawo an nag-antos hin mga sintomas han kahilu-i han Red Tide ngan duha an naawat an kinabuhi.
An Bureau of Fisheries and Aquatic Resources in pirmi nagpapahinumdom nga hapagkayana deri angay kaunon an mga pangti-on tikang han mga kadagatan nga nasasakop han Irong-irong Bay ha Samar, San Pedro Bay ha Basey, Cancabato Bay ha Tacloban, Carigara Bay, ug an Matarinao Bay ha Eastern Samar. #
