Isumat.com/8:07AM, October 13, 2020
Maabot hin 45 nga anay mga rebelde nga NPA an nagpaka-agom hin hinabang tikang ha gobyerno basi nira gamiton pagpatikang han ira pagpakabuhi.
An nasabi nga mga rebel returnees in tikang ha mga munisipalidad han Tabango, San Isidro ngan Calubian ha probinsya han Leyte. Subay han report han 8th Infantry Division-Philippine Army, nakakarawat hin tag-Singko Mil Pesos nga kantidad hin mga produkto an kada usa ha ira basi igbaligya ha ira sari-sari stores.
Ginlalakipan ini hin noodles, sardinas, corned beef, sabon ngan iba pa nga produkto. Ini in suporta han gobyerno basi makabalik na hira ha normal ngan mamurayaw nga kinabuhi katapos han masamok nga kahimtang han nakadto pa hira ha kagi-usan nga Komunista.
Ini nga mga beneficiario in lakip han sobra usa ka yukot nga NPA Fighters ngan miembro han Militia ng Bayan ha katungdan nga parte han Leyte nga nagsurender ha 802nd Infantry Brigade hadton Abril 2019.
Samtang, usa naman nga NPA Rebel ha Northern Samar an nagtubyan han iya kalugaringon ha pwersa han gobyerno.
Pira pala ka adlaw an nag-agi, an 28-anyos nga hi alias “Rey” an sumurender ha Northern Samar PNP. Iya gihapon ginsurender an 45-kalibre nga pistola ngan mga bala. Hi Rey in kaapi han Amihan-Squad 2 han Sub-Regional Committee Emporium han NPA.
Nagsering an rebelde nga amo ini an hingyap han iya pamilya tungod kay nakakakita hira han mahimyang nga kinabuhi han mga naha-una nga mga rebelde nga bumalik ha piyod han balaud. #
