Isumat.com/3:45PM,July 21, 2020
Nagtitikadamo an mga lugar denhi ha Eastern Visayas nga magamit han QR (Quick Response) Code para han contact tracing ngan iba pa nga panuyu-anan yana nga panahon han pandemya durot han COVID-19.
Durante han haruharampang han mga kaapi han Biliran Inter-Agency Task Force, makusog nga iginduso ni Governor Rogelio Espina nga gamiton na an QR Code didto han ira probinsya. Sumala ha iya, kinahanglan matikangan na ini yana nga bulan han Hulyo o sunod nga bulan.
An gobernador in nagpahayag nga importante nga magkamay-ada hini nga teknolohiya basi magin madagmit an mga pitad ingkaso may mga natatapnan han virus o mayda mga naka-kwarentina nga magawas han Quarantine Facility.
Denhi ha Region 8, an Ormoc City in naglunsad hini nga proyekto hadton Hunyo ngan ginsundan han Tacloban City hadin Hulyo 16.
Mayda report nga nagin epiktibo an proseso ha Ormoc kay bisan ngani hi DOH Secretary Francisco Duque in tumagusya ngan karuyag niya nga an istilo han QR Code ha Ormoc in gamiton ha bug-os nga nasud.
Denhi naman ha Tacloban, naprobaran nga dako an gamit han teknolohiya kay usa nga Locally Stranded Individual an nabisto nga gumawas ha iya Quarantine Unit ngan pumakadto hin tindahan. Nabuksot an LSI nga waray magtuman han patakaran han kwarentina kay deri pa tapos an duha ka semana, gumawas na hiya. Nahisabtan ini dida han scanner han QR Code han tindahan.
Dara hini, an LGU-Tacloban in nag-aandam hin legal nga aksyon kontra hini nga LSI tungod han iya pagtalapas han health protocol. #
