Isumat.com/2:15PM, July 21, 2020

Mahugot nga nagpahimatngon an Department of Social Welfare and Development ha publiko kontra han “scam” nga facebook account nga kunuhay maghahatag hin mga benepisyo tikang han ahensya.

An ngaran han tinuyaw nga fb account amo ini: DSWD Social Amelioration Program Sponsor. Naghahatag hin mga proseso ini nga fb account basi makadaog hin balay, salapi, gadgets ngan iba pa an mga indibiduwal nga maapi han pa-raffle.

Pero antis maka-api han paripa, kinahanglan magpadara anay hin load kantidad hin 150 pesos ngadto ha DSWD Secretary ngan tatagan ka hin cellphone number para han pag load.

Kataliwan hini, pagsasa-aran ka nga puede ka makadaog hin housing unit, 50 ngadto 500 mil nga salapi ngan iba pa. Magsasa-ad pa nga igpapadara ha money remittance center an kwarta nga madadaugan .

Kinahanglan gihapon nga imo igpadara an imo ngaran, address ngan contact number.

Nagsering an DSWD nga dako ini nga buwa ngan panguwat sanglit deri angay gumagad hini kay ma-aanaw la an imo iginpa-load. Igindig-on pa han ahensya nga deri hira nag-aaro hin load ha bisan ano nga transaksyon ha ira opisina.

Nagsering pa an DSWD nga an opisyal nga fb account han DSWD amo ini : dswdfieldoffice08 ug an website: fo8.dswd.gov.ph. #