Isumat.com/8:22AM, October 27, 2020
Senyales na ba ini han deri na maiha nga pagkaladkad han sitwasyon ha pulitika ha probinsya han Samar samtang nagtitikaharani na an piniliay?
Han nag-agi nga pira ka adlaw, nagkagawas ha social media an pabatak-batak hin pagsuson nira Calbayog City Mayor Ronald Aquino ngan Samar Governor Reynolds Michael Tan kasumpay han mga proyekto han ira nasasakupan nga mga lugar.
Syahan nga nagpilak hin komentaryo hi Aquino mahitungod han proyekto han Samar Provincial Government nga San Juanico Bridge Aesthetic Lighting. Dida han post ha Facebook ni Aquino, mayda litrato han parte han tulay nga deri nagana an mga suga ngan mayda niya caption nga “MADE IN CHINA AN LIGHTS PUNDIDO DAYON.”
Ini nga post ni Aquino an ginbaton ni Tan pinaagi hin pagsering nga Testing o dry-run pala adto basi masabtan kun mayda kulang o problema dida han proyekto ngan unta deri magpagawas hin peke nga impormasyon an alkalde han Calbayog.
Paghagos hin pira ka adlaw, nagpost hin litrato an gobernador kun diin makikit-an an poste han gintutukod nga gymnasium ha Brgy Capoocan, Calbayog City nga teritoryo ni Aquino. Sering ni Tan, “MADE IN CHINA?”
An duha nga pulitiko in tikang hin magkaribal nga hugpo ha Samar. Pira na ka dekada nga nagkaka-asdangay ha posisyon an mga pulitiko tikang han magkaluyo nga panig.
Hi Aquino in tikang pa hadto kaapi na han Partido Liberal. Antis hiya magin Calbayog Mayor, nagin konsehal ngan Vice-Mayor hiya han syudad. Hiya in aada ha ikatulo ngan katapusan nga termino komo alkalde ngan waray pa klaro yana kun ano nga posisyon an iya dadalagan sunod nga eleksyon. An pamilya Tan in pira na ka beses nga nagbutang hin ira kandidato ha Calbayog pero waray makaperde kan Aquino.
Ha luyo nga bahin, hi Tan in deri pala maiha ha pulitika. Nagin Bise-Gobernador hiya hadton 2016 ngan natudlok nga Gobernador komo liwan han namatay nga iya nanay Milagrosa Tan. Hiya in dumalagan ha partido PDP-Laban. An pamilya Tan an naghadi na ha kapitolyo ngan ha segundo distrito han probinsya hin maiha na nga panahon. #
