An mga Health Personnel han LGU-Kananga samtang nagdudumara han disinfection ha kampo han Army ha Brgy Aguiting. (Photo by Dr Adrian Bragat)

Isumat.com/9:13AM, October 27, 2020

Igin-implmentar an lockdown ha kampo han 93rd Infantry Battalion ha Brgy Aguiting, Kananga, Leyte dara han pagpositibo han Covid-19 hin 21 nga mga sundalo.

Tungod hini, waray makakagawas tikang han kampo nga mga tropa ug pagsusuplayan hira hin pagkaon ngan mga panginahanglan han LGU ngan iba nga units han Philippine Army.

Dida han imbestigasyon han mga otoridad han panlawas, an syahan nga nagpositibo han kagaw an usa nga sundalo nga bumalik katapos hin operasyon ha San Isidro, Leyte hadton Oktubre 10. Pagkabuwas, gin-admit hiya ha Ormoc Doctors Hospital han maghiranat, magkaada hin ubo ngan magsinuka. Katapos hin tulo ka adlaw, gumawas an resulta nga positibo hiya han Covid.

Hinungdan hini, gin-swab test gihapon an iya mga ka-updanan ngan tobtob yana, 21 na hira nga nagpositibo han virus.

An LGU in nagdumara na hin contact tracing sugad man disinfection didto han nasabi nga kampo. Temporaryo gihapon nga ginsuspender an operasyon han Rural Health Unit kay nagkwarentina an mga Health Personnel tungod nga iginka-urusa an pira ha ira han pagtimangno han mga sundalo.

Samtang, 61 na nga Covid Patients ha Eastern Visayas an naawat an kinabuhi. An bag-o nga duha nga namatay in taga Catarman ngan Laoang, Northern Samar. An Active Cases hapagkayana in 961.

Ha kabug-usan, 6,357 na an Total Cases han rehiyon ngan 5,335 an naka-recover. #