Isumat.com/7:12AM, October 7, 2020
Maiha na nga surok hin panginabuhi an paghimo hin bomba, paburuthon ngan Improvised Explosive Device (IED) han mga mulopyo ha pira nga parte han San Antonio, Northern Samar.
Nagpahayag hi Col Arnel Apud, an hepe han Northern Samar PNP, nga hadto pa ini natatabo nga pagpinanhimo hin IED didto han masighot nga kabubkiran ha Brgy Burabod han nasabi nga bungto. Kadam-an nga katawhan hini nga parte han bungto an nasarig dida han kwarta nga nakukuha tikang han pabrika hini nga mga paburuthon nga nahihimo nga bomba ngan dinamita.
Iginbuyagyag gihapon ni Apud nga an mga utok ngan taghimo han mga paburuthon in nagpaka-eskapo kay mayda nagtimbre ha ira nga mayda magroronda nga mga kapulisan. Igindugang pa han opisyal nga iginkalabog ha kadagatan an mga “finished products” nga bomba ngan dinamita sanglit an ira narekupo pag-abot didto han lugar in mga materyales nala ha paghimo han mga eksplosibo.
Nahahadlok gihapon an mga baryuhanon pagtestigos o pagsumat han mga pangilal-an kun hira hin-o an nagdudumara han nasabi nga pabrika, pahayag pa ni Apud.
Subay han panguna nga imbestigasyon, waray pulitiko nga nagpapaluyo han nasabi nga iligal nga aktibidad, sering pa han Northern Samar Provincial PNP Director.
An mga materyales ha paghimo han mga paburuthon in tikang ha Cebu ug an grupo an nagsusuplay han mga paburuthon ha Bicol ngan Eastern Visayas.
Minilyon-milyon pesos balor hin mga ekipahes ngan materyales paghimo hin paburuthon ngan IED an narekupo han mga otoridad didto han isla nga bungto han nag-agi nga tulo ka semana.
