Isumat.com/7:50AM, July 22, 2020
KInahanglan maka-agom gihapon hin umento ha sweldo an mga nurses nga nagtatrabaho ha pribado nga mga hospital.
Ini an igindig-on ni Alfon Guiller Daga, an Governor han Eastern Visayas Chapter han Philippine Nurses Association (PNA). Amo ini an kabatunan ni Daga han sitwasyon ha pribado nga mga hospital kun diin an mga nurses in deri lakip han salary increase nga igpapatuman ha pampubliko nga hospital.
Ha deri pala maiha, an Department of Budget and Management in nagpagawas hin kamanduan han umento han sweldo han public nurses kataliwan la magdesisyon an Korte Suprema nga ig-implementar an iginlalarang han Philipiine Nursing Act.
Sumala kan Daga, iginkalipay ini han mga nurses nga nagseserbisyo ha gobyerno, pero deri angay hikalimtan an mga nurses ha pribado nga sektor. Nagsering hiya nga an mga private hospital nurses in bumulig han pakigbisog ngan mga protesta basi ma-implementar ini nga balaud.
Hinungdan hini, nagpasarig hi Daga nga an PNA in maniningkamot nga magkaada gihapon hin sugad hini nga kalungganayan an mga nurses ha private hospitals nga ginkokonsiderar nga “over-worked, under-paid.”
Ha mga pribado nga hospital denhi ha Eastern Visayas, an mga nurses in nakarawat hin sweldo kada bulan nga nagkakantidad tikang 10 Mil ngadto ha 15 Mil pesos.
Dida han kamanduan han DBM, an sweldo han bag-o nga nurse ha gobyerno in makarawat na hin 32 Mil pesos nga Basic Monthly Salary. #
