Isumat.com/7:20AM, July 22, 2020

Humagos anay hin napulo ka adlaw antis maka-abat nga gindudukdok na hiya han iya konsensya hinungdan nga sumurender ha kapulisan in usa nga mister nga nagpatay hin brutal han iya misis ha Catbalogan City, Samar.

Dida han report han Samar PNP, an suspetsado in ginkilala nga hi Antonio Mustacisa, 65 anyos nga construction worker. Ginkilala naman an biktima nga hi Annabelle Carcillar, 34 anyos nga ka live-in partner han suspetsado. Hira in nag-uukoy ha Purok 6, Pier 2, Catbalogan.

Subay han pag-asoy ni Mustacisa, natabo an insidente hadton gab-i han Hulyo 10, 2020. Nagsering hiya nga tungod hin ura-ura nga pangabugho, waray niya makontrol an iya kapungot ngan pira ka beses nga ginmalmalan niya hin martilyo an ulo ni Carcillar hinungdan han kamatay hini.

Kataliwan han krimen, iginlubong ni Carcillar an patay nga lawas han biktima ha ilarum han ira balay. Pero kakulop, Hulyo 21, an suspetsado in boluntaryo nga nagtubyan han iya kalugaringon ngadto han mga otoridad ngan gin-angkon an krimen nga iya ginhimo.

Pumakadto dayon an kapulisan han lugar han krimen ngan ginbuligan hira han mga opisyal han barangay pag-ukad han patay nga lawas han biktima. An suspetsado in preso na yana ha Catbalogan PNP ngan nakatalaan atubangon an kaso nga igsasalawad kontra ha iya. #