Isumat.com/12:16PM, September 7, 2020
Nagtikaribhong la an natatabo nga NBA Playoffs tungod han pagresbak han LA Lakers han ira paludhon an Houston Rockets, 117-109, dida han Game 2 ha Western Conference Semifinals.
Igbusay la makawang an 21-puntos nga abante han Lakers dida han first half kay nakalanat ngan naka-insima ha ira an Rockets ha third quarter. Pero nakapamuhay-puhay an grupo ni Lebron James ngan ira ginlatag an mahugot nga depensa sanglit waray na maka-arte hira James Harden dida han last quarter.
Pagtikang pala han mulay, nagin mapaso an arangkada han Lakers ngan nakalabaw hira hin 21 puntos. Pero pag-abri han 3rd quarter, naghulog hin 14-0 nga bomba an Rockets hinungdan nga naagaw han Houston an abante ha pagtapos han 3rd quarter, 92-90.
Pero nag-iba an timplada han katapusan nga quarter kay ginposasan han Lakers an mga shooters han Houston. Gindunganan pa ini han mga pikada nira James ngan Anthony Davis salit nagloslos na an Rockets.
Hi James an nagpa-arak hin 28 puntos inupdan hin 11 rebounds ngan 9 assists samtang hi Davis in nagrehistro hin 34 puntos.
Hi Harden an nanguna para han Rockets pinaagi hin 26 puntos ngan nag-amot hin 24 puntos hi Eric Gordon. Waray naman makaporma hi Russel Westbrook kay an iya nahimo 10 puntos la.
Posible naman nga deri makagmulay ha Game 3 hira Lakers Javalee McGee ngan Dion Waiters dara han ira gin-antos nga injury dida hini nga mulay.
An Game 3 in bubuhaton dida hiton Mierkules. #
