Isumat.com/1:34PM, September 7, 2020
Mahugot nga nagpahimatngon an abogado han establisemento nga 578 Emporium nga sasampaan niya han kaangayan nga kaso an naghimo ngan nagpasarang han peke nga notisya mahitungod han tindahan.
Hi Atty Leo Giron, legal counsel han nasabi nga kompaniya, in nagdig-on nga waray iginpapagwas nga pahayag an 578 Emporium ha Social Media mahitungod han ira mga pitad yana nga panahon han Covid-19 Pandemic. Kun mayda man, ini nga mga notisya in magdadara han iya pirma komo abogado han kompaniya, sering ni Giron.
Dara hini, deri mag-aalang an establisemento pagpasaka han kaangayan nga kaso ha takna matudlok na nira an nagbuhat hini.
Kun manunumduman, gumawas ha social media an nasabi nga pahayag han establisemento nga nagsesering nga deri mahadlok an publiko pagsulod han tindahan. Kun obserbaran an pagkomposo han notisya, pataraw-an pa gud an istilo han kasurat hini. (Basaha ha igbaw an ginkomposo nga peke nga notisya)
Nagdig-on hi Giron nga an sugad hini nga binuhatan in pagdaot ngan pagdum-it han integredad han kompaniya.
Pira na ka semana an nakalabay, nagin sentro ha mga balita an 578-Emporium ha Borongan tungod kay nakapasyada ngadto an usa nga mulopyo nga nagpositibo han virus. #
