Isumat.com/9:15AM, September 8, 2020
Waray kalooy nga iginmodmod han Boston Celtics an Toronto Raptors dida han ika-lima nga oyag han NBA Eastern Conference Semifinals ha score nga 111-89.
Tungod hini nga paka-igbaw han Boston, naka-abante hira ha serye, 3-2, ngan usa nala nga daug an ira kinahanglan para magmartsa hira ha Finals han Eastern Conference Finals kun diin ira igkakakumbati an magmamalinangpuson ha butnga han Miami Heat ngan Milwaukee Bucks.
Ha luyo nga bahin, kinahanglan ma-angkon han Raptors an nasasalin nga duha nga mulay basi deri hira masikaran ha ira trono komo Defending Champions han NBA.
Pag-abri pala han mulay, naglalalahinggab na an pikada han Celtics salit ira nakuha an 1st quarter, 25-11. Ira pa iginpadayon an pagtambak han puntos dida han 2nd quarter sanglit an score ha halftime in 62-35 pabor han Boston.
Pira ka beses nga nagpruweba paglanat an Toronto ha 3rd quarter pero waray gud nira nahimo han depensa nga igin-andam han Celtics. Hi Jaylen Brown in nagboma hin 27 puntos basi pangunahan an pag-atake han Boston.
An Game 6 in nakatalaan dida hiton Huebes (Setyembre 10). #
