Isumat.com/7:28AM, August 22, 2020
Sobra na hin Dos mil ka tawo an nagpositibo han Covid-19 ha Eastern Visayas. Nadugangan hin 135 nga pasyente kakulop sanglit umabot na ha 2,053 an nagkatatapnan. Lakip han mga natapnan an 209 nga Health Workers.
Umabot naman ha 1,303 an naka-recover katapos la nga makatalwas kakulop an 79 nga mga pasyente. Mayda naman 741 nga Active Cases hapagkayana.
Dida han gibabag-uhi nga report han DOH Regional Office, an bungto han Villareal, Samar an grabe nga nabunalan han virus kay mayda hira bag-o nga 59 nga kaso. Ini nga mga pasyente in nagkatatapnan han naha-una nga nagpositibo didto han ira bungto. Naka-lockdown yana an siyam nga barangay nga namumutang ha poblacion han munisipalidad.
Nadugangan naman hin 25 nga Positive Cases an Tacloban City. Kasumpay hini, an City Government in nagpagawas hin kamanduan para han istrikto nga pagbantay han gi-os han katawhan ngan igin-implementar an pagderi hin mga katitirok sugad man liquor ban ha bug-os nga syudad tinikangan yana nga adlaw.
Nagpapadayon gihapon an paglobo han ihap han nagkatatapnan ha Catbalogan City. 19 an bag-o nga kaso didto hini nga syudad ug ngatanan gintutudlok nga Local Transmission. Kakulop, iginbalik an mas istrikto nga Enhanced Community Quarantine ha Catbalogan.
Ha bungto han Hinabangan, Samar, local transmission gihapon an rason han katapni hin upat ka tawo.
Ha Southern Leyte, napulo an mga bag-o nga kaso ha mga bungto han San Ricardo, San Juan, San Francisco, Padre Burgos ngan Malitbog. Hira ngatanan in mga Locally Stranded Individuals.
Usa naman nga lalaki nga Frontliner an bag-o nga pasyente ha Borongan City, Eastern Samar. An syudad in aada yana ha Hard Border Lockdown tobtob buwas para makagdumara hin hingpit nga contact tracing.
Mga LSI ngan OFW an bag-o nga mga kaso ha Jaro, Carigara, Babatngon, Isabel, Abuyog ,Mahaplag, Palompon ngan Tabango ha probinsya han Leyte.
Mayda health worker nga natapnan ha Palo, samtang local resident naman an bag-o nga kaso ha Tanauan.
Tikang naman ha Paranaque City nga LSI an natapnan ha Calbayog City. #
