Isumat.com/3:02PM, Sugust 3, 2020
Nanawagan an Philippine Army denhi ha aton rehiyon ngadto han New Peoples’ Army nga igsurender an mga rebelde nga nagkasasamad dida han mga aragway basi pagtambalon ngan masalabar an kinabuhi.
Hi LtCol Reynaldo Balido, namumuno han 87th Infantry Battalion han Philippine Army, in nag-awhag ha liderato han NPA partikular ha Samar nga igtubyan nala ha poder han gobyerno an samaran nga mga rebelde. Sumala han opisyal, mas importante an kinabuhi han nasabi nga mga rebelde kontra han baliko nga idolohiya nga ira iginpapakigbisog.
Sering pa ni Balido nga damo na nga enkwentro an natabo ha butnga han militar ngan NPA kun diin gindadara han mga kumunista an mga kaapi nira nga samaran nga nagreresulta hin kamatay. An makabirido pa hini kay kun namamatay iginlulubong la hin deri tuhay nga paglubong.
An iba nga samaran in ginbabayaan la han mga rebelde ngan namamatay, dugang pa ni Balido. Han nag-agi nga pira ka bulan, sunod-sunod an natabo nga asdangay han AFP ngan mga rebelde ha Samar ngan Northern Samar.
Ha deri pala maiha, narekupo han mga tropa han gobyerno in usa nga kampo han NPA ha San Jose de Buan ngan gintotoohan nga damo an samaran ha panig han mga rebelde dida han enkwentro antis makuha han mga sundalo an kampo.
Kun manunumduman, mayda liwat natad-an nga iginlubong nga mga kaapi han NPA didto hin usa nga bungto ha Northern Samar han una nga semana.
Ha atubangan hini, padayon gihapon an panawagan han AFP ha mga rebelde nga bumalik na ha piyod han gobyerno ngan makapahimulos han mga programa para han mamurayaw nga kinabuhi. #
