Isumat.com/2:22PM, August 3, 2020

Nagruruhaduha an Tacloban City Council pagpasa hin ordinansa nga magmamando pandakop ngan pagmulta han mga mag-aangkas ha motorsiklo nga waray barrier o dibisyon, sumala kan Vice Mayor Sambo Yaokasin.

Ha usa nga interview ha 99.1 iFM-RMN Tacloban, iginpahayag ni Yaokasin nga nag-aalang an mga miembro han konseho nga magpasa hin ordinansa kasumpay hini tungod nga nakakaghatag ini hin disbentaha para han mga motorista ug an ira pamilya.

Para kan Yaokasin, nakakaghatag ini kadugangan nga kagarastusan para han motorista kay mapalit pa han barrier ngan nagdudurot pa hin kadelikaduhan para han mga sakay han motorsiklo. Dara hini, sugadsugad nga waray intresado nga kaapi han konseho nga magduso hin ordinansa.

Lugod, maghihimo hin paghangyo an City Council ha National Inter-Agency Task Force Against COVID-19 nga igrekonsiderar ini nga patakaran ngan deri na ini ig-implmentar.

Antis hini, hi TOMECO chief Ronnie Cornico in nagsumat nga deri hira mandadakop han mga motorista ha Tacloban nga deri magsusunod hini kun waray ordinansa. Ginklaro ni Cornico nga ira la sasagdunan an mga motorista nga magbutang han barrier, pero deri nira titiketan ngan mumultahan.

Pero igindig-on ni Cornico nga dadakpon ngan mumultahan an waray helmet, waray facemask, waray lisensya ngan waray rehistro an motorsiklo.

Hadin Agosto 1, an mga kaapi han PNP in nagtikang na pandakop han magka-angkas nga waray barrier ngan ginmumultahan. Nagsering an PNP nga nasunod la hira han patakaran nga iginpalusad han National IATF. #