Isumat.com/7:21AM, September 18, 2020
Katapos hin sobra usa ka bulan nga pagmiringaw han mga nagpopositibo han Covid-19 nga mga Locally Stranded Individuals (LSI) ha Eastern Visayas, na-ooberbaran nga nagtitikahitaas na liwat ini han nag-agi nga pira ka adlaw.
Dida han 68 nga bag-o nga kaso nga iginreport kakulop (Setyembre 17) han DOH, 28 ha ira an mga LSI. Hadton Setyembre 16, napulo nga LSI an nagpositibo. Posible nga epekto ini han utro nga pagtugot han Regional Task Force nga makasulod ha rehiyon an mga LSI.
Dida han report kakulop han DOH, an mga bungto nga mayda LSI nga nagkatatapnan amo an Mahaplag-8, Carigara-6, Hindang-7, Barugo-2, Burauen-3, Javier-2 ngan Kananga-1.
An mga LSI nga mga residente han Mahaplag in tikang ha Quezon City, Manila ngan Cebu. Tikang naman ha Laguna, Quezon City ngan Cebu an mga taga Hindang; tikang naman ha Caloocan an mga LSI nga natapnan ha Barugo.
Nagpapadayon gihapon an paglobo han mga nagkakatatapnan ha syudad han Catbalogan pinaagi han Local Transmission. 17 an ira bag-o nga kaso ngan ngatanan ha ira in mga Close Contacts.
Nadugangan naman hin unom nga pasyente an Tacloban City. An Calbayog mayda naman lima nga kaso.
An Tacloban, Catbalogan ngan Calbayog amo an mga syudad ha Rehiyon Otso nga waray hugpoy an pagsarang han virus pinaagi han local transmission.
Dida han 664 nga nagpositibo ha Tacloban, 453 na an naka-recover, 201 an Active Cases yana ngan 10 an namatay.
Hapagkayana, 4,025 na an natapnan han kagaw ha Eastern Visayas ngan 3,417 (84%) an nakarecover. Mayda yana 568 nga Active Cases ngan umabot na ha 40 nga Covid Positive an namatay. #
